O Magazin Rom tano jekh kvartalno hem badihava internet-magazin. Amaro fokus tane o Roma, a amari primarno idea tani te vazda e Romengoro interes e čitibase. O teme ko magazin šaj te oven kultura, integracia, svakodivesoro đandipe, informacia, muzika, sastipe, ajgara, nevipe, historia, kariera… O Magazin Rom tano jekh forum kuri o Roma kotar celo sveto šaj te diskutirinen razna teme, te vačeren jekh važno informacia, te reklamirinen pe… Znači o magazin barjola hem asimilirini pe premalo e Romengere kritike hem premalo e Romengoro čefi!
Amen momentalno pisinaja ko Arli dialekti, amam dijekhvar šaj te publicirina artiklia ko avera Romane dialektia.
O moto kotar o magazin tano te pisini pe odija čhib sar so vačeri pe čhere!
Zalo amari Romani čhib, jekh artikli pisinaja ki Švedsko čhib, sebepi amen o Roma kokri mangaja te bičhala i korektno informacia kotar e Romengiri historia, čhib, kultura, adetia… Ađahare mangaja te probina te perava o stereotipia hem te čhinava i diskriminacia premalo Roma ko avdisutno društvo. Đi akana but gađe pisije, vačerđe, prezentirinđe hem đilabđe kotar o Roma, ama retko keda ikljislo hine ko šukar.
Amari filozofia tani, so niko na penđari e Rome pošukar kotar o Rom!
O Magazin Rom tano bizo profiti! Iniciativa te čerel pe jekh esavko projekti ljelja o Sead Šerifi – Sejo. Ov kontaktirinđa fantastična manušen kola bizo problemi prihvatinđe akava izazov. Sarinenđe sviđisalji akija idea hem sarine prihvatinđe te pisinen badihava, bizo pare!
Seljani kotar redakcia,
info@magazinrom.com
Sead Šerifi - Sejo
Mirsad Šerifi - Mišo
Brima Gudinci
Dennis A. Demirovic - Pipi
Ilija Rajkovic - Icko
Emran Murina